الشاعر محمد عامر التميمي
زعم ليبيا نفرح ونزهي فيها
والا السعادة مايوم نحلم بيها..؟!!
زعم ينتهي هالهم
لاحروب فيها ليبيا لادم
يلتم شملها والخير فيها ايعم
ويلطف الله بحالها يهنيها..؟!!
!!!!!!
زعم ليبيا ترتاح
يعم الرخاء والأمن والأفراح
والا كما لكباش ديمة انطاح
ف كل حوش …
عيلة فاقدة غاليها!!؟
!!!!!!!
زعم تنسى أحزانها
وافراح السعادة تنفتح بيبانها
وياخد المولى الحق ف اللي خانها
اتولّي أيام الحزن من ماضيها..!!؟
!!!!!!!
زعم ليبيا تتهني
وهلها يعيشوا في ربيع وجنة
وكل حد فيها اينال مايتمنى
والا الشقاء مكتوب دوم عليها!!!؟
!!!!
محال يصلح حالها
اتعيش ليبيا زاهي ورايق بالها
ومادام الفسس في اكبارها وعقّالها،،؟!!
اتزيد تنقلب عاليها على سافيها
!!!!!!
يارب ليبيا تحلالي
فيها انتهنى ويرتاح فكري وبالي
ويلتم شملها بأمر الكريم العالي
القلوب اتوحد ماعاد حرب اتريها!!؟
!!!!
زعم ليبيا نفرح ونزهي فيها
والا السعادة مايوم نحلم بيها..؟
اكتشاف المزيد من New Jetpack Site
اشترك للحصول على أحدث التدوينات المرسلة إلى بريدك الإلكتروني.