” طبعك وطبع الناس “

شعر محكي- أحمد جلنقة

مِنْ قال : طبع الناس مِنْ طبعك ..؟

ومِنْ قال : طبعك يِرْضِي جِمِيعْ النّاس ..؟

طَحْنُ الرَّحَى ..

يِفْرِقْ عَنِ الْمِهْرَاس ..

طِحينَ الرَّحى ..

إن حَدَرْ ماعاد ينْسَاسْ ..

والمِهْرَاسِ بِيَدكْ ..

الليِّن وِالْمِقياس ..

يْقُولُوا : بُو طبع ما إيخَلِّيه ..

ويْقولوا : بو طبع طْبوعْ ..

وأنتَ طبعك ..

تْبُوحْ بْكُلْ مَاعِندكْ ..

إِنْكَانَ حَبِّيتْ ..

ماتعرف للْمَحبة إقْيَاسْ ..

وتْقَولْ موشْ مِنيِّ ..

وإنكَانْ عَادِيتْ ..

ضَرْبَك يْجِي في الرَّاسْ ..

وِتَقولَ ظالـِمْني ..

وَنَا نَنْصَحَكْ ..

يَاصَاحْبِي والسَّامْعِين ..

إنْحَبّيْت يا صاحبي ..

خَلِّي للعداوة فجوة ..

وِإنْعادِيتْ يا صاحبي ..

خَلِّي للمحبة فجْوة ..

إيْعَادِيكْ مَنْ حَبَّك ..

وْيَبْقَى كيف مَنْ مْعَادِي نَفْسَه ..

والسّر مَاعَادْ يَبْقى سِرْ ..

وِيْحِبَّك إللّي عَادِيتْ ..

وْْيَنْسَاه جَرْحَكْ ..

وِيكَْافِيكْ بالغَلا ..

حِبْ ، وْأعْرِفْ ..

ليِشْ ، وينْ ، وكيْف ..

وْأكَّرْه ، وأعْرِف ..

كيف ، و وين ، وليش ..

وأحْسِبْ ثلاثة فِي لْخَطَا تلقاهن ..

أحْسِب الزّمان ..

وأحْسِب المكان ..

وأحْسِب نَفْسَك يا إنسان ..

وأحْسِب الله يا صاحبي..

 وأحْسِب ، وأحْسب،

وأحْسب.