أنا خاطري في طلعـــة

مساجلة شعرية شعبية (شعر شعبي ليبي) بدأتها الدكتورة هند علي الساحلي ردا على قصيدة لشاعر شعبي متخذة البداية بمطلع قصيدة الشاعر ( أنا خاطري في طلعة ) فكانت المساجلة بين الشعراء :

(1)

انا خاطري في طلعة ..

نرفع معاي اسبيزتي والولعة

وعالة الشاهي….

نرفع معاي أوجاعي ..

نخش بَر خالي لا غنم لا راعي ..

حصيري الرملة والوساد ذراعي ..

ونسهر علي نار الغلا المندلعة ..

ننسي اللي هاين عليه وداعي ..

ونجبر عظام الصدر ضلعة ضلعة ..

وخاطري في طلعة …

(2)

رد للدكتورة هند الساحلي :

وانا خاطري في طلعة ..

نخش الخلا بكتاب شعر وشمعة ..

نشكي ونبكي للسما المستمعة ..

ونمسح دموع العين دمعة دمعة ..

نرفع معاي أوراقي .،

ونرفع معايا حيرتي واشواقي ..

يا حزن يسكن مهجتي واعراقي

يسقيه كاس المر جرعة جرعة  ..

نرفع معاي حنيني ..

ونرفع معايا، نجر ثقل سنيني ..

بالكي الخلا يا صاحبي يواسيني ..

ويبقى الونس في غربتي والمرعى ..

ويا ناس نبيي طلعة ..

(3)

شارك السجال الاديب الفلسطيني المقيم في ليبيا الأستاذ أحمد بشير العيلة بالأبيات التالية  :

وانا خاطري في طلعة ..

مليت من دمعة تواري دمعة ..

اتعبت .. خانقتني مصايب سبعة ..

قهرة رجال وعِيلة ..

وكثرة الدين .. اغلبتْ كيف انشيله ..

ونظرة شماتة من رفيق طويلة ..

وضيقة أحوال وهم كاثر سيله ..

وفرقة عزيز

كدايري مجتمعة ..

لو كان نطلع طلعة ..

ننسى وتهدى كبوتي المندلعة ..

وانا خاطري في طلعة …