محمد التميمي
لأن السكر بلونك
وحلاه ف رمشة اجفونك
سباني يوم ماشفتك
جمال السحر
وسحر الشعر
اللي مكتوب ف عيونك
ولأن القمر تشبهلك
ونور البدر من نورك
وحتى الشمس تغار منك
بعد ماتكون ف حضورك
انخاف انجيك وانزورك
أتخاف عليك من نفسي
من يسراي وايميني
انخاف عليك من همسي
مابين الخاطر وبيني
انخاف عليك
من فكرة اتحاصرني
انرددها
من نظرة اتغازلني
انبعدها
وحتى بعد نطردها
أتعاود ترجع اتجيني
انخاف عليك
من عشقي
ومن شوقي
وشيء ف القلب كاويني
انخاف عليك من عيني
ف لحظة ضعف تغريني
انخاف عليك..عليك مني
انا معيان تاريني
وحتى انكان عينتك
وبسهم العشق أنا صبتك
أكيد الناس تعذرني
وكل الحق تعطيني
لأنك انت فوق الوصف
ولأن السكر بلونك
وحلاه ف رمشة اجفونك
وحتى الشمس تغار منك
بعد ماتكون ف حضورك.
ولأني يوم ما شفتك
صرعني سحرها عيونك
ولأنك انت فوق الوصف
تخيلتك كما ليلى
وانا وليت مجنونك
ولأنك انت فوق الوصف
ايكون الله في عوني
وايكون الله في عونك
