عفاف عبدالمحسن
في لحظة ألم غربة
وانا نمشي علي ترابك وعايش ليك
وانا متغطي بالغيمة الي ترويك
ويشرق نور في قلبي انقول زعم !!!
وآن يشرق سناها فيك
وانا شايف سماك في الفجر .. نصلي
ونرفع ايدي نبي ندعي ومش عارف
أنا آسف أنا آسف .. ندعيلك الله يفرج
ولا من الألم ندعي الله يهديك
الله يشفيك
الله يكفيني من شرك
ومش شرك الي طالني وطال الناس
خيرك ديمه يايمي .. وفينا الشر
شر الناس الي ساكنهم الخناس
ماشي فدمهم يايام يا اميمة يا أمي
تحشرج صوتي من البكية
وهستيريا ضحك نابي
سمعتيه الضحك .. بايع ومش شاريك
زي السوط في صدري .. ايجرحني وعلي جنابي
كوميديا سودا عشناها
كيف نحلم بجنة بيك …
كيف ندعي الله يعليك
وانا شايف جنينك يحرق ايدمر
ايخوض النار ويغامر عشان يمص من جمك
نسيت الامان الي حسيت
نسيت الفرح كيف نبداه
يعمر بيتي في شرقاك
والزغرودة من سبها
والزكرة فمصراته
والمالوف يربخ من عروس شاطيك
كرهت العمر الي عشته بطوله ليك
بنهرب من عشق طينك
ونهرب من وَلَهْ بحرك
وصورة الثلج في غريان كيف يهبط التبروري
بحنه يحوط خضرة في جبال ككلة
وتزين جبالنا السود بالخمرة
يفوح المسك في الكفرة
أنا كاره ….. هيامي بيك
طويت احساس غامر بالمحبة ليك
نبي نرتاح من حبك
ومن كرهك
ونشعر بالسلام نجيك
نشرب من مياه نهرك فبنغازي
واللاقبي نشرب مالقي في الجفرة يرويني
وطاسة ثالثة باللوز خضرة من طريق الشط
شاب ينادي حلاوي .. حلاتة نخلات الحميدية
قبل طرحة رطب في جالو ….
يرطاب الكلام عليك
يايمي .. أنا كذاب .. أنا مانقدر
انحس بكريهه لشورك
أنا نبعد شوي عنك .. نعاود نجري ونزورك
عمري ماطويت احساس .. غامر
بالمحبة ليك
كرهت العيش من مرار ضايقينة
يفكر خايب م الأولاد
يفتت خبزك ايقسيك ويخونك
وانت طيبة يمي وأم الخير
ياعروفي ويادمي
يالون سمرة عيون الآنسات الغيد
وقوة عضد شبانك يعلوا للسما شانك
يعيدوا الحزن .. فرحة عمر
وكل شروق
جماعة .. من حدك إلحدك
يصلوا فيك .. صلاة العيد
