عصام الصابري
كنت اندوّر … عاللي غايب
طيفه عالمطراح
واليوم اجتمعن ..
اغيابه .. والمطراح طاح
………..
بعد غيبة اللي فالظهر ينحطّوا
تمّينا انتخطّوا فالوجع وانلطّوا
…………
خمسين واخرى زيد تسع اعوام
اليوم بالتمام
ما خنتها ولا نخونها
وبيدي انحيد السل من عرجونها
وانوبره
واندنكسه وانصبره
وانحوّض عليها
ومن وريدي ودمعتي نرويها
انا اللي سعفها فاتله
ونا اللي نواها شاتله
وامسيبه لله تحت غيومه
وكل حد ويومه
وان ما طلت ناكل منّه
اتجي قرعتي فالجنٌه
واتعيشوا فهنا وسلام
من وسط قلبي مو امغير كلام
خمسين واخرى زيد تسع اعوام