((ياما ناظرين))

فتحي القابسي

ياما ناظرين ..

لكن فيه مانا ميسين ..

في هالوطن

….   ….   ….   ….  ….

ياما من عذاب ..

نظرنا فيه وأياماً صعاب ..

ربيع العمر كله والشباب ..

عدى كيف ما ترمش العين

أنحلوا باب ينسدن أبواب ..

وعينا فيه ديمة شارقين

وظني كان نحسبلك حساب ..

زهانا فيه كلا ساعتين

لكن وين يلذعنا الغياب ..

أنجو على الحال شورا راميين

أيقولوا المر في بعد الأحباب ..

مرار الوطن كيفه مرتين

….   ….   ….   ….  ….

ياما من هموم ..

نظرنا فيه من ضيق العلوم

سنين العمر عدن يوم يوم ..

عشنا فيه كيف الميتين

عز الظهر ورانا النجوم ..

لكن فيه مانا أمسلمين

ومهما إيدير فينا على العموم ..

إحنا وياه مانا قاسمي

….   ….   ….   ….  …

ياما ناظرين ..

لكن فيه مانا ميسين ..

في هالوطن .. ياما ناظرين